Flúrar unglinga á salernum

Nokkur brögð hafa verið að því í bæjunum Ulstein og Hareid í norska fylkinu Mæri og Raumsdal á vesturströnd landsins að óprúttinn húðflúrlistamaður, sem hvorki hefur leyfi yfirvalda til iðju sinnar né stofu til að sinna henni, bregði á það ráð að bjóða bleksólgnum unglingum þjónustu sína á almenningssalernum, biðstofum og ámóta stöðum sem almenningur hefur aðgang að og eru innandyra.

„Þetta hefur gerst á ótrúlegustu stöðum,“ segir Hans-Eirik Pettersen sýslumaður í samtali við Vikebladet Vestposten sem er í læstri áskrift en það er norska ríkisútvarpið NRK sem hefur fréttina eftir. „Salerni og biðstofur eru engir staðir til að ástunda húðflúr, þarna er á ferð leyfisskyld starfsemi auk þess sem þetta býður upp á smithættu og sjúkdóma,“ segir sýslumaður sem hefur gert fylkislækni aðvart um málið.

Netmiðillinn Din Avis fjallar einnig um málið og segir vitað til þess að sjö ungmenni hið minnsta hafi látið glepjast til að kaupa þjónustu flúrlistamannsins. 

Eiga ekki að geta látið flúra sig að geðþótta

NRK ræðir við Anders Pilskog, formann Nemendaráðs Gagnfræðaskólans í Hareid, sem segist fyrst hafa heyrt af málinu í fjölmiðlum en brugðið illilega við. „Það á ekki að vera þannig að unglingar geti látið húðflúra sig að eigin geðþótta,“ segir Pilskog og vísar til þess að ólögráða einstaklingar, undir 18 ára aldri, þurfi skriflegt leyfi forráðamanna til að leggjast undir nálina.

Ríkisútvarpið ræðir einnig við Remi Sølvberg, formann Samtaka húðflúrlistamanna í Noregi (n. Norsk Tattoo Union), sem segir fréttirnar óhugnanlegar: „Við fylgjum verklagsreglum um hanskanotkun, hreinsaðan útbúnað og hreint umhverfi,“ segir Sølvberg sem enn fremur segist auðvitað hafa heyrt um húðflúrlistamenn sem stunda iðju sína utan regluverksins. Þegar hafi orðið eitt dauðsfall í Noregi vegna sjúkdómasmits við húðflúrstarfsemi bendir formaðurinn að lokum á.

• Blogga um frétt