Lögðu hald á 3,2 tonn af fílabeinum

Yfirvöld í Kambódíu lögðu hald á meira en 3,2 tonn af fílabeinum í gámi sem sendur var frá Mósambík. Tollyfirvöld í Kambódíu segja þetta vera mesta magn fílabeins sem lagt hafi verið hald á í landinu fram að þessu.

Tollverðir segja þetta merki um að viðskipti með ólöglegar dýraafurðir hafi aukist mikið í landinu undanfarið, en talið er að slík viðskipti nemi tugum milljarða í þessum heimshluta ár hvert.

Eigandi gámsins, sem ekki hefur verið nafngreindur, kom ekki og vitjaði gámsins, en yfirvöld segja óljóst hvort sendingin hafi átt að fara á markað í Kambódíu eða annarsstaðar í nágrannalöndum.

Þetta er ekki fyrsta stóra smyglið á fílabeinum sem kemst upp í Kambódíu undanfarin ár, því í fyrra lögðu yfirvöld hald á um eitt tonn sem hafði verið komið fyrir í holum trjádrumbum og árið 2014 var lagt hald á þrjú tonn í gámi fullum af baunum.

• Blogga um frétt