Í sífellt fleiri löndum er lagt bann við aðferðum gyðinga og múslima við að slátra nautgripum. Nú síðast voru samþykkt lög í Belgíu, sem kveða á um að rota verði dýr áður en þeim er slátrað. Þar býr hálf milljón múslima og um 30.000 gyðingar.
Slík bönn hafa verið lögð á víðar en það sem er óvenjulegt í þessu tilfelli er fjöldinn, því 5% Belga eru múslimar. Þetta er stærri hópur en venjulega. Talsmenn gyðinga gagnrýna lögin harðlega og segja þau valda „alvarlegustu krísu síðan í seinni heimsstyrjöld“.
„Þetta er sorgardagur fyrir gyðinga í Evrópu og sorgardagur fyrir trúfrelsi almennt,“ er haft eftir Pinchas Goldschmidt, formanni evrópskra rabbínasamtaka, í spænska dagblaðinu El País.
Ritningar þessara trúarhópa gera kröfu um að ekki megi svipta dýrin meðvitund áður en þeim er slátrað, heldur skuli þau skorin á háls svo þeim blæði út. Þetta getur valdið þeim óþarfa þjáningum, að mati margra dýraverndarsinna. Kristin trúarbrögð gera ekki þessa kröfu; þar er öllu jöfnu rotað, áður en dauðrotað.
Lögbannið tekur í fyrstu aðeins til Flæmingjalands en stefnt er á að breiða út reglugerðina er fram líða stundir. Alþingi Íslendinga leggur blátt bann við svokallaðri halal-slátrun og hið sama gildir um önnur Norðurlönd og Slóveníu.