Stór hluti Evrópu á kafi í snjó

Snjókorn virðast falla á flesta Evrópubúa þessa dagana nema Íslendinga ef marka má myndir og fréttir frá ríkjum í Suður-Evrópu og víðar þessa dagana. Bæjaraland í Þýskalandi er á kafi í snjó og það hefur jafnvel snjóað í Aþenu. Svíar glíma í dag við storminn Jan en honum fylgir mikil ofankoma.

Bæði í Þýskalandi og Svíþjóð hefur þurft að aflýsa skólahaldi vegna snjókomunnar og eins eru vegir lokaðir og almenningssamgöngur lamaðar víða.

Rauði krossinn er með fjölmarga hjálparstarfsmenn að störfum á hraðbrautum Bæjaralands við að aðstoða fólk við að komast leiðar sinnar. Níu ára drengur lést í Bæjaralandi í gær þegar hann varð undir tré sem brotnaði undan snjóþunga. 

Í Austurríki stendur yfir víðtæk leit að pólskum snjóbrettamanni sem villtist eftir að hafa farið út fyrir merkta braut í Schlossalmbahn. Í gær snjóaði gríðarlega í Austurríki og herma fréttir að þar sé snjódýptin á einhverjum stöðum þrír metrar. Tveggja fjallgöngumanna er saknað frá því á laugardag og sjö hafa látist á nokkrum dögum í snjóflóðum. 

AFP fréttastofan hefur eftir sérfræðingi á Veðurstofu Austurríkis að það gerist ekki nema á 30-100 ára fresti að svo mikið snjói á undirlendi (undir 800 metra hæð) líkt og gerst hefur þar undanfarna viku. 

Frétt SVT

Frétt BBC