Qunun komin til Kanada
Setja bókamerki
Rahaf Mohammed al-Qunun, 18 ára hælisleitandi frá Sádi-Arabíu, er komin til Kanada. Stjórnvöld þar í landi veittu henni hæli í gær.
Qunun var stöðvuð á flugvellinum í Bangkok síðustu helgi þar sem hún flúði fjölskyldu sína og ætlaði að reyna að komast til Ástralíu. Hún segist vera í lífshættu á heimili sínu og þar sé hún beitt andlegu og líkamlegu ofbeldi.
Í fyrstu ætluðu taílensk yfirvöld að vísa henni úr landi og senda til fjölskyldunnar að nýju en vegna umfjöllunar, fyrst á samfélagsmiðlum og svo fjölmiðlum, var hætt við það á mánudagsmorgun. Qunun hefur, vopnuð snjallsíma og myllumerki, leyft heiminum að fylgjast stöðugt með máli sínu og þurfti hún fljótlega að loka Twitter-aðgangi sínum vegna líflátshótana.
Chrystia Freeland, utanríkisráðherra Kanada, tók á móti Qunun við komuna til landsins og lýsti henni sem „mjög hugrökkum nýjum Kanadamanni“. Qunun var þreytt eftir ferðalagið og kaus að ávarpa ekki fjölmiðla að þessu sinni. Qunun flaug frá Bangkok til Seoul og þaðan til Pearson-flugvallarins í Toronto.
„Hún er mjög hugrökk ung kona sem hefur gengið í gegnum margt. Hún ætlar núna að fara á sitt nýja heimili,“ bætti Freeland við. Stjórnvöld í Kanada voru fljót að bregðast við beiðni Qunun um hæli og sagði Justin Trudeau, forsætisráðherra Kanada, að sjálfsagt væri að verða við beiðni Sameinuðu þjóðanna um að veita Qunun hæli.
„Kanada hefur verið skýrt í afstöðu sinni um að berjast fyrir mannréttindum og réttindum kvenna um heim allan,“ sagði Trudeau meðal annars.
Qunun segir að hún hafi verið beitt andlegu sem og líkamlegu ofbeldi af hálfu fjölskyldu sinnar en mannréttindasamtök segja að hún hafi afneitað íslam sem geti þýtt að hún verði sótt til saka í Sádi-Arabíu.
Bjarkey stendur við skammarbréf Svandísar
Unnu að fullum heillindum að kaupum á TM
Almannavarnir auka viðbúnað
Segjast ekki vera á kaldri slóð
Segjast hafa skotið niður langdræga sprengjuvél
„Búið að vera í dreifingu í einhvern tíma“
Aðkoman í gripahúsið mjög slæm