Yfirvöld á Taílandi undirbúa nú að nota flugvélar með búnaði til að framkalla rigningu til að draga úr mengun í höfuðborginni Bangkok. Mengunarský hefur legið yfir Bangkok undanfarnar vikur og vonast yfirvöld til að ná að draga úr menguninni með rigningu.

Regngerðin felst í því að nýta flugvélar til að dreifa ákveðnu efni í skýjaslæðuna, sem samkvæmt kenningunum a.m.k. á að valda rigningu.

„Hin konunglega regngerðar- og landbúnaðarflugmáladeild gerir ráð fyrir að hafa lokið regngerðinni á morgun, en það veltur þó á vindstyrk og loftraka,“ hefur AFP-fréttaveitan eftir Pralong Dumrongthai, aðstoðarforstjóra taílensku mengunarvarnanna.

Bangkok er að sögn Greenpeace númer tíu á lista yfir menguðustu borgir heims og kemur mengunin og koltvísýringurinn m.a. frá umferðinni á vegum landsins, bruna bænda á ökrum sínum að loknum uppskerutíma og losun frá verksmiðjum.

Taílenskir fjölmiðar og samfélagsmiðlar hafa verið duglegir að fjalla um mengunina undanfarið og m.a. rætt hvaða gerðir af hlífðargrímum fólk eigi helst að nota. Mengunarvarnadeildin vill þó meina að mengunin hafi enn ekki náð þeim hæðum að hlífðargrímur séu orðnar nauðsynlegur staðalbúnaður á götum úti.

Undanfarnar vikur hafa borgarstarfsmenn þó úðað vatni á götur og upp í loftið í borginni til að reyna að draga úr menguninni og yfirvöld hafa sömuleiðis hvatt fólk til að halda sig innandyra.

„Mengunarvandinn er að verða meiri og tíðari hér í Bangkok,“ sagði Tara Buakamsri, yfirmaður Taílandsdeildar Greenpeace. „Við þurfum skynsamlegri loftgæðastjórn.“

Tengdar fréttir

Loftslagsvá

„Þeir hafa ekki alveg verið að standa við sitt“

• Stórt svæði orðið eldi að bráð
• Thunberg: „Aðeins byrjunin“
• Svissneska ríkið sakfellt í loftslagsmáli
• Hitamet slegið í Austurríki

» Fleiri tengdar fréttir

• Blogga um frétt