Víðtæk kerfisvilla á norskum sjúkrahúsum

Upplýsingakerfi stærsta heilbrigðisumdæmis Noregs, Helse Sør-Øst (suð-austur), sem þjónustar 2,9 milljónir Norðmanna liggur nú niðri og er ekki hægt að nálgast sjúkraskrár eða aðrar upplýsingar um sjúklinga, að því er segir í umfjöllun NRK.

Gripið hefur verið til þess ráðs að handskrifa allar upplýsingar og munu starfsmenn sjúkrahúsanna þurfa að færa alla handskrifaða vinnu inn í tölvukerfið þegar því er komið í lag.

Um er að ræða kerfi þekkt undir skammstöfuninni DIPS og er það notað við öll sjúkrahús í heilbrigðisumdæmum norðurs, vesturs og suðausturs.

„Verið er að kortleggja umfang og framkvæma villuprófanir,“ er haft eftir upplýsingafulltrúa Sykehuspartner, Julie Dommerud. Sykehuspartner er fyrirtæki í eigu umdæmisins sem sinnir öllum tæknimálum, flæðistjórnun og mannauðsmálum.

„Háskólasjúkrahúsið í Ósló er undir. Það þýðir að allt fer fram á pappír á þessum tímapunkti. Þeir [starfsmenn] sem þegar voru innskráðir í kerfið þegar það hrundi virðast enn getað notað það til þess að prenta út upplýsingar og sjúkraskrár þeirra sjúklinga sem þegar eru innlagðir,“ segir Hedda Holt, fjölmiðlafulltrúi sjúkrahússins.

• Blogga um frétt