Tala látinna eftir sprengingu í eldsneytisleiðslu í Mexíkó á föstudagskvöld fer hækkandi en yfirvöld í Mexíkó hafa staðfest að 73 létu lífið að minnsta kosti og 74 slösuðust. Enn á eftir að fjarlæga tugi líka af slysstaðnum.
Orsök sprengingarinnar er að öllum líkindum leki sem kom að leiðslunni og var fólk að ná sér í bensín þegar sprengingin varð og gríðarmikill eldur blossaði upp.
„Allir komu til að reyna að fá smá eldsneyti fyrir bílana sína. Það er ekkert bensín á bensínstöðvunum,“ segir bóndinn Isaias García í samtali við Reuters-fréttastofuna. Að sögn vitna hafði hópur fólks komið að leiðslunni með sultukrukkur og fötur til þess að ná sér í nokkra dropa af bensíni þrátt fyrir aðgerðir stjórnvalda til þess að sporna við eldsneytisþjófnaði.
Alríkisstjórnin í Mexíkó hefur lagt áherslu á það að undanförnu að reyna að draga úr eldsneytisþjófnaði en talið er að hann hafi kostað ríkissjóð 3 milljarða Bandaríkjadala árið 2017.