Tryggja samstarf sitt innan ESB

Frakkland og Þýskaland hafa gert með sér sáttmála sem ætlað er að tryggja áhrif þeirra innan Evrópusambandsins. Með sáttmálanum skuldbinda löndin sig til þess að vernda frjálslynd gildi Evrópusambandsins í ljósi útgöngu Bretlands úr sambandinu og uppgöngu popúlisma í Evrópu og víðar.

Angela Merkel, kanslari Þýskalands, leggur áherslu á frið og öryggi Evrópu og tekur undir mikilvægi uppbyggingar Evrópuhers. Emmanuel Macron Frakklandsforseti segir að áskorunin sé að gera Evrópu að eins konar skildi gagnvart uppþoti í heiminum.

Merkel og Macron skrifuðu undir sáttmálann í þýsku borginni Aachen, sem í Frakklandi gengur undir nafninu Aix-la-Chapelle.

Sáttmálinn kveður á um að Frakkland og Þýskaland muni nú gefa út sameiginlegar yfirlýsingar um málefni Evrópusambandsins, og gerir samband þeirra innan þess þannig formlegt, en ríkin tvö hafa lengi átt í samstarfi innan sambandsins.

Umfjöllun BBC.

• 1 blogg um fréttina

Bloggað um fréttina

• Páll Vilhjálmsson: Fjórða ríkið og Ísland