Bandarísk stjórnvöld ætla að setja refsitolla á venesúelska olíufyrirtækið PDVSA, sem rekið er af ríkinu. Frá þessu greindi John Bolton, þjóðaröryggisráðgjafi Bandaríkjanna, í kvöld. Bolton segir að það komi ekki greina að Nicolas Maduro, forseti landsins, geti haldið áfram að græða á auðlindum sem eru í eigu þjóðarinnar.
Þjóðaröryggisráðgjafar Hvíta hússins hvetja herinn í Venesúela á sama tíma til að samþykkja „friðsamleg“ valdaskipti í landinu, það er að Juan Guaido sem lýsti sig réttmætan forseta landsins á miðvikudag taki við af Maduro.
Bolton fer fram á að herinn og öryggissveitir samþykki valdaskiptin sem séu „friðsamleg, lýðræðisleg og í samræmi við stjórnarskrá landsins“.
Steven Mnuchin, fjármálaráðherra Bandaríkjanna, segir að eina leið Maduro til að aflétta refsitollunum sé að afsala sér völdum og samþykkja Guaido sem réttmætan forseta Venesúela.
Aðspurður hvort Donald Trump Bandaríkjaforseti hafi íhugað möguleg afskipti bandaríska hersins af stjórnmálaátökunum í Venesúela sagði Bolton að skýrt hefði komið fram í máli forsetans að ekkert væri útilokað í þeim efnum.
Guaido, þingforseti og leiðtogi stjórnarandstöðunnar í Venesúela, lýsti því yfir á samfélagsmiðlum í kvöld að hann væri að „ná yfirráðum yfir eignum ríkisins erlendis til að koma í veg fyrir að valdaræninginn [þ.e. Maduro] og menn á hans vegum næðu að tæma fjárhirslur ríkisins“.
Guaido hefur einnig hvatt til frekari mótmæla næsta miðvikudag og næsta sunnudag. Annars vegar til þess „að krefjast þess að herinn taki sér stöðu með fólkinu“ og hins vegar til þess að lýsa yfir stuðningi við kröfur frá ýmsum ríkjum í Evrópu um að nýjar þingkosningar fari fram innan viku.