Sanders: Guð vildi Trump sem forseta

Sarah Sanders fjölmiðlafulltrúi Hvíta hússins segir það vilja Guðs að ...
Sarah Sanders fjölmiðlafulltrúi Hvíta hússins segir það vilja Guðs að Trump sé forseti. AFP

Sarah Sanders, fjölmiðlafulltrúi Hvíta hússins, segir Guð hafa viljað að Donald Trump yrði forseti. BBC segir Sanders hafa látið þessi orð falla í viðtali við kristna sjónvarpsstöð, Christian Broadcasting Network (CBN). Þar hafi hún jafnframt sagt þetta vera ástæðu þess að Trump sæti nú á forsetastóli.

Þá sagði Sanders einnig „mjög erfitt“ að taka á móti kennslustundum í siðferði frá Demókrataflokknum.

Demókratar á Bandaríkjaþingi hafa harðlega gagnrýnt hugmyndir Trump um múr á landamærum Bandaríkjanna og Mexíkó og segja siðferðilega rangt að reisa slíkt mannvirki.

Trump nýtur mikils stuðnings hjá þeim Bandaríkjamönnum sem tilheyra evangelísku kirkjunni og greindi Washington Post frá því á sínum tíma að 80% kosningabærra einstaklinga innan evangelísku kirkjunnar hefðu kosið Trump í forsetakosningunum 2016. Það er hærra hlutfall en kaus frambjóðendur Repúblikanaflokksins þá Mitt Romney og John McCain í kosningunum þar á undan.

Sjónvarpsmaðurinn David Brody spurði Sanders út í stöðu Trumps í viðtalinu, sem sýnt var í gær. „Ég held að Guð ætli okkur öllum að gegna mismunandi hlutverkum á mismunandi tímum og ég held að hann hafi viljað að Donald Trump yrði forseti,“ sagði Sanders.

„Þess vegna er hann hér og mér finnst hann hafa staðið sig frábærlega í að styðja fjölda þeirra hluta sem trúuðu fólki er virkilega annt um.“

Spurð út í viðhorf Nancy Pelosi, demókrata og forseta fulltrúadeildar þingsins, varðandi landamæramúrinn, gagnrýndi Sanders þá skoðun Pelosi að bygging múrsins bryti í bága við siðferði.

„Satt best að segja er mjög erfitt á þessum tímapunkti að taka á móti fyrirlestrum frá demókrötum um það hvað er siðferðilega rétt og hvað ekki,“ sagði Sanders og kvað ásakanir Pelosi vera „fáránlegar“ og nokkuð sem Pelosi kunni síðar að sjá eftir.

„Að verja íbúa landsins [...] það er frumskylda forseta Bandaríkjanna.“

mbl.is
Vantar gæslu fyrir kisu/kisann?
www.kattholt.is rekur hótel fyrir kisu/kisann. kattholt@kattholt.is // s;567 ...
UHD skjáir ( 4k )
Upplýsingar gefur Ólafur hjá Varmás ehf. sími 566 8144 ...
Vantar Trampólín
Viltu selja eða bara lostna við Trampólínið þitt, kem og tek það niður ef vill.....