Robert Mueller, sérstakur saksóknari bandarísku alríkislögreglunnar FBI, fer fram á allt að 24 ára fangelsi yfir Paul Manafort, fyrrverandi kosningastjóra Donalds Trump Bandaríkjaforseta. Krafan er sett fram vegna þess að Manafort braut gegn samningi sínum við Mueller með því að ljúga að saksóknaranum.
Í gær var greint frá því að dómarinn Amy Berman Jackson hefði úrskurðað að Manafort hafi logið að saksóknaranum með því að hafa komið með „fjölda falskra fullyrðinga“ í samtölum sínum við FBI, starfsmenn Muellers og fyrir kviðdómi.
Mueller fer með rannsókn FBI á meintum afskiptum Rússa af bandarísku forsetakosningunum 2016 og tengslum þeirra við framboð Trumps.
Manafort var sakfelldur fyrir fjármálasvik í ágúst á síðasta ári í tengslum við starf hans sem stjórnmálaráðgjafi í Úkraínu. Í kjölfarið gerði hann samning við Mueller um að bera vitni í tengslum við Rússarannsóknina og hljóta fyrir vikið vægari dóm fyrir brot sín.
Í málsgögnum saksóknaraembættisins gegn Manafort má sjá að embættið taki undir með útreikningum dómsmálaráðuneytisins um að Manafort ætti að fá 235-293 mánaða dóm og sekt sem væri á milli 50 þúsund dala og upp í 24,4 milljónir dala. Til viðbótar að gera ætti upptækar 4,4 milljónir á reikningi Manafort.