Þrír þingmenn breska Íhaldsflokksins hafa yfirgefið flokkinn og gengið til liðs við sjálfstæðan hóp átta fyrrverandi þingmanna Verkamannaflokksins sem sögðu skilið við flokkinn síðustu daga.
Þingkonurnar Anna Soubry, Sarah Wollaston og Heidi Allen greindu frá ákvörðun sinni í sameiginlegu bréfi til Theresu May, leiðtoga Íhaldsflokksins.
„Það er með mikilli eftirsjá sem við segjum okkur úr flokknum,“ segir meðal annars í bréfinu. Þá segja þær að Brexit hafi endurskilgreint flokkinn til hins verra.
Þingkonurnar styðja veru Bretlands í Evrópusambandinu og munu nú vinna með þeim átta þingmönnum Verkamannaflokksins sem hafa sagt sig úr flokknum vegna stuðning flokksins við Brexit, auk þess sem þeir eru þeirrar skoðunar að flokknum hafi mistekist að koma í veg fyrir að gyðingahatur þrífist innan hans.
Þessi ellefu manna hópur sjálfstæðra þingmanna hefur jafn marga þingmenn og Frjálslyndir demókratar og fleiri þingmenn en Lýðræðislegi sambandsflokkurinn.