Þingmaður í Sómalíu var skotinn til bana í höfuðborginni Mogadishu í dag. Vígasamtökin Al-Shabaab bera ábyrgð á morðinu en þingmaðurinn var á níræðisaldri.
Osman Elmi Boqore var einn elsti þingmaður landsins áður en hann var myrtur rétt við heimili sitt í norðurhluta höfuðborgarinnar.
Árásarmaðurinn flúði af vettvangi í bíl.
Lögreglan greindi frá því að þingmaðurinn hefði verið myrtur og að árásarmannsins, eða mannanna, væri leitað.
Vígasamtökin Al-Shabaab lýstu yfir ábyrgð á tilræðinu á vefsíðu sinni. Mohamed Abdullahi Mohamed, forseti Sómalíu, fordæmir verknaðinn.
„Það þarf að rannsaka þetta mál hratt og örugglega og árásarmaðurinn þarf að svara til saka,“ kom fram í yfirlýsingu forsetans.