Nicolás Maduro, forseti Venesúela, lofaði hersveitir landsins fyrir hollustu sína við hann og þakkaði þeim fyrir að brjóta á bak aftur „valdaránstilraun“ þingforsetans og stjórnarandstöðuleiðtogans Juan Guaidó.
BBC segir Maduro hafa látið þessi orð falla á fundi með stuðningsmönnum sínum í gær, en tugþúsundir Venesúelabúa tóku þátt í mótmælafundum í landinu í gær. Höfðu bæði Maduro og Guaidó beðið stuðningsmenn sína að fylkja liði á götum höfuðborgarinnar Caracas og víðar.
Maduro kenndi einnig „netárásum“ stjórnarandstöðunnar um rafmagnsleysið sem víða hefur verið í landinu undanfarna daga.
„Við viljum marséra! Jú við megum það!“ var á meðal þess sem stuðningsmenn stjórnarandstöðunnar hrópuðu þegar lögregla kom í veg fyrir að þeir gætu gengið um götur í austurhluta Caracas í gærdag. Til átaka kom á nokkrum stöðum milli stuðningsmanna Guaidó og lögreglu. Hrópuðu sumir mótmælendur „morðingjar“ á lögreglu sem brást við með því að beita piparúða.
Maduro sagði Guaidó, sem lýsti sig forseta landsins til bráðabirgða í janúar, vera „trúð og strengjabrúðu“ bandarískra stjórnvalda. „Þeir buðu hernum að standa fyrir valdaránstilraun og svar þeirra var skýrt — þeir hafa sigrast á skipuleggjendum valdaránsins,“ sagði Maduro.
Guaidó tilkynnti stuðningsmönnum sínum hins vegar á mótmælafundi að hann myndi fljótt halda í ferð um landið þar sem hann myndi kalla á alla sína stuðningsmenn að taka þátt í fjöldamótmælum í Caracas „mjög fljótlega“.
„Við ætlum að fá alla Venesúelabúa til Caracas, af því að við þurfum á þeim öllum sameinuðum að halda,“ sagði Guaidó, sem yfir 50 ríki hafa viðurkennt sem forseta Venesúela til bráðabirgða.