Þrír farast í flóðum í Bandaríkjunum

Miklar rigningar og þíða hafa valdið sögulegum flóðum í nokkrum ríkjum miðvesturhluta Bandaríkjanna. BBC segir þrjá hafa látið lífið í flóðunum, m.a. mann sem var að reyna að bjarga fólki úr ísköldu flóðavatninu, og þá hafi þúsundir neyðst til að yfirgefa heimili sín.

Flóðahæð í fimm ríkjum hefur leitt til brottflutninga á íbúum og hafa flóðin lokað á vegi um nokkur byggðarlög sem fyrir vikið er ekki hægt að flytja hjálpargögn til.

Öflugur vetrarstormur fór yfir Bandaríkin í síðustu viku.

Tony Evers, ríkisstjóri Wisconsin, sagði hlýindi og rigningu undanfarinna daga hafa valdið því að mikið af snjó hafi bráðnað, sem hafi svo aftur valdið flóðum og krapastíflum í ám og víkum.

Ár í Missouri, Iowa og Nebraska hafa sumar náð mikilli hæð á nokkrum stöðum og var íbúum bæjanna Bartlett og Thurman til að mynda skipað að yfirgefa heimili sín er stíflugarðar brustu.

Þrír hafa farist í flóðunum og tveggja til viðbótar hefur nú verið saknað í nokkra daga.

Flóðin hafa lokað á vegi um nokkur byggðarlög sem fyrir vikið er ekki hægt að flytja hjálpargögn til. AFP

• Blogga um frétt