Tugir þúsunda Breta hafa gengið um miðborg London í dag og krafist annarrar þjóðaratkvæðagreiðslu um veru Bretlands í Evrópusambandinu.
Mótmælendur úr herferðinni „Látum þetta í hendur fólksins“ ætla að enda göngu sína fyrir framan breska þinghúsið, að sögn BBC.
Efnt var til mótmælagöngunnar eftir að ESB ákvað að fresta Brexit um nokkrar vikur.
Theresa May, forsætisráðherra Bretlands, kveðst ætla að hætta við áætlanir um aðra atkvæðagreiðslu um Brexit-samning sinn fari svo að of fáir þingmenn styðji samninginn.
Ef þingmenn samþykkja ekki samninginn þarf Bretland að útbúa annars konar samning varðandi útgönguna úr ESB eða að yfirgefa sambandið án samnings 12. apríl.