Rússneskur saksóknari fór fram á að Norðmaður sem hefur verið sakaður um að hafa njósnað um kjarnorkukafbáta Rússa verði dæmdur í 14 ára fangelsi.
Saksóknarinn Milana Digayeva fer fram á að Norðmaðurinn Frode Berg taki refsingu sína út í vinnubúðum þar sem fangar vinna erfiðisvinnu.
Búist er við niðurstöðu dóms eftir viku.
Berg, sem er 63 ára, var handtekinn í Moskvu árið 2017 eftir leynilega aðgerð rússnesku leyniþjónustunnar FSB.
Mikil leynd hvílir yfir dómsmálinu og fer það fram fyrir luktum dyrum. Samkvæmt frétt AFP neitar Berg sök.
Fyrrverandi rússneskur embættismaður hafði áður verið ákærður fyrir að afhenda Berg skjöl um rússneska sjóherinn og hlaut hann þrettán ára fangelsisdóm í desember.
Berg játaði að hafa starfað sem sendill fyrir norsku leyniþjónustuna í nokkur skipti en kvaðst ekkert vita frekar um sendingarnar.
Fram kemur í frétt AFP, að samskipti rússneskra og norskra stjórnvalda hafi verið góð í gegnum tíðina en þau versnuðu til muna árið 2014 þegar Rússar hófu hernaðaraðgerðir í Úkraínu.