Þjóðin mátt þola „óstjórn og spillingu“
Setja bókamerki
Omar al-Bashir, fyrrverandi forseti Súdans, hefur verið vikið úr embætti og hann handtekinn. Frá þessu greinir varnarmálaráðherra landsins. Bashir hefur verið við völd í landinu í tæpa þrjá áratugi.
Awad Ibn Ouf, varnarmálaráðherra Súdans, sagði í sjónvarpsávarpi að herinn muni taka við stjórnartaumunum í landinu næstu tvö árin, og í kjölfarið muni fara fram kosningar.
Ouf sagði ennfremur, að búið væri að lýsa yfir neyðarástandi í landinu sem mun vara næstu þrjá mánuði.
Fram kemur á vef BBC, að mikil mótmæli gegn Bashir hafi staðið yfir í landinu undanfarna mánuði, en forsetinn hefur stýrt landinu frá árinu 1989.
Skipuleggjendur mótmælanna hafa hvatt landsmenn til að halda áfram að mótmæla þrátt fyrir aðgerðir hersins.
Ekki liggur fyrir hvar Bashir er í haldi.
Ouf segir að þjóðin hafi mátt þola „óstjórn, spillingu og skort á réttlæti“. Hann baðst afsökunar á því ofbeldi og dauðsföllum sem hafi átt sér stað í landinu.
Hann sagði ennfremur, að stjórnarskrá landsins hefði verið numin úr gildi, landamæri lokuð ótímabundið sem og lofthelgi landsins lokuð í sólarhring.
Fjölmenni kom saman til að fagna eftir að fréttirnar bárust, en margir komu saman við höfuðstöðvar hersins í Kartúm, höfuðborg landsins. Sumir föðmuðu hermenn og klifruðu upp á brynvarin ökutæki.
Þá segir leyniþjónusta landsins að öllum pólitískum föngum verði veitt frelsi.
Eyjafjarðarbraut lokað vegna alvarlegs umferðarslyss
Kostnaður meiri en milljón á fermetra
„Á réttri leið en nokkuð í land ennþá“
Sex hafa greinst með listeríu
Vélsleðaslys: Þyrlan kölluð út á mesta forgangi
Shakespeare fannst í skókassa
Árshátíð ríkislögreglustjóra haldin í Tékklandi
Skar höfuðleðrið af íslenskri konu