Erlent | AFP | 12.4.2019 | 20:24 | Uppfært 30.6.2019 17:08

Varnarmálaráðherra Súdans segir af sér

Ahmed Awad Ibn Auf, varnarmálaráðherra og yfirmaður herráðsins í Súdan, hefur sagt af sér embætti, degi eftir að forseta landsins var steypt af stóli. AFP

Ahmed Awad Ibn Auf, varnarmálaráðherra Súdans og yfirmaður herráðsins í landinu, hefur sagt af sér embætti, degi eftir að hann tók við völdum. Herinn vék Omar al-Bashir, fyrrveranda forseta Súdans, úr embætti í gær og hneppti í stofufangelsi.

Frétt af mbl.is

Þjóðin mátt þola „óstjórn og spillingu“

Bashir hefur verið við völd í landinu í tæpa þrjá áratugi. Mótmæli hafi staðið yfir í landinu undanfarna mánuði, en forsetinn hefur stýrt landinu frá árinu 1989. Að minnsta kosti 38 hafa látið lífið í mótmælunum frá því að þau hófust í desember.

Auf sagði í sjónvarpsávarpi í gær að herinn muni taka við stjórnartaumunum í landinu næstu tvö árin, og í kjölfarið muni fara fram kosningar. Skipuleggjendur mótmælanna hvöttu landsmenn hins vegar til að halda áfram að mótmæla þrátt fyrir aðgerðir hersins. Telja þeir að herinn tilheyri valdaklíkunni. Auf hedur ekki gefið frekari skýringar á afsögn sinni.

Auf var yfirmaður hermála þegar blóðuga deilan í Darfur-héraði braust út árið 2003. Bashir hefur verið ákærður af Alþjóðaglæpadómstólnum fyrir alþjóðlega stríðsglæpi. Auf baðst í gær afsökunar á því ofbeldi og dauðsföllum sem hafi átt sér stað í landinu.