Erlent | AFP | 13.4.2019 | 20:19 | Uppfært 20:43

Fara fram á skattaframtöl forsetans

Donald Trump Bandaríkjaforseti. AFP

Demókratar í fulltrúadeild Bandaríkjaþings krefjast þess að fá afrit af skattaframtölum Donald Trump Bandaríkjaforseta og gefa honum frest til 23. apríl til að skila þeim.

Demókratar hafa áður krafið Trump um skjölin en ekki fengið þau.

Frétt af mbl.is

Fá ekki að sjá skattaskýrslu Trumps

Richard Neal, formaður skattanefndar fulltrúadeildarinnar, lét hafa eftir sér að litið væri á það þannig að Trump hefði hafnað fyrri beiðninni um skjölin. Hann fer fram á afrit síðustu sex ára frá forsetanum.

Repúblikanar segja að með þessu sé verið að fara fram á trúnaðargögn en demókratar segjast ekki búa í einræðisríki og krafan sé fullkomlega eðlileg.

Lögmaður Trump líkti beiðninni við „áreitni“. Áður hefur Trump sagt að framtölin séu endurskoðuð af skattayfirvöldum og á meðan megi ekki afhenda þau.

Hefð er fyrir því að allir forsetaframbjóðendur afhendi skattframtöl sín fyrir kosningar. Allir hafa gert það frá 1976 en Trump ákvað að gera það ekki.