Víetnömsk kona sem var sökuð um að hafa drepið Kim Jong-nam, hálfbróður leiðtoga Norður-Kóreu, verður látin laus 3. maí næstkomandi. Þetta hefur AFP-fréttastofan eftir lögmanni konunnar.
Doan Thi Huong var dæmd í þriggja ára og fjögurra mánaða fangelsi í Malasíu í upphafi þessa mánaðar. Hún var ekki ekki dæmd til dauða fyrir morð heldur játaði hún sig seka um minni háttar brot. Stjórnvöld í Víetnam kröfðust þess að morðákæran yrði látin niður falla.
Upphaf afplánunar er miðuð við daginn sem Huong var handtekin eða í febrúar 2017 og því verður hún látin laus í næsta mánuði.
„Huong er ákaflega glöð,“ segir lögmaður hennar, sem býst við því að hún muni snúa rakleiðis aftur til Hanoi þegar hún verður látin laus.
Önnur kona sem einnig var handtekinn vegna dauða Kim var óvænt látin laus nýverið. Siti Aisyah er frá Indónesíu og var hún látin laus eftir að dómsmálaráðherra Malasíu hafði afskipti af málinu. Enginn hefur því verið dæmdur ábyrgur fyrir dauða Kims.
Kim var drepinn með VX-taugagasi á flugvellinum í Kuala Lumpur um hábjartan dag árið 2017. Morðið vakti mikla athygli á sínum tíma vegna þeirrar fífldirfsku sem það bar vitni um og hafa lögmenn Aisyah og Huong haldið því fram að konurnar hafi verið gabbaðar af yfirvöldum í Norður-Kóreu. Fjórir norðurkóreskir útsendarar voru einnig ákærðir vegna málsins en konurnar tvær töldu sig vera að taka þátt í sjónvarpshrekk þegar þær sprautuðu efni í andlit Kim.