Erlent | AFP | 13.4.2019 | 7:42

Vill að Trump sýni breytt hugarfar

Donald Trump og Kim Jong-un áttu sögulegan fund í júní á síðasta ári. Leiðtogarnir tveir segjast báðir tilbúnir að hittast á ný á þessu ári, eftir árangurslausan fund í janúar. AFP

Kim Jong-un, leiðtogi Norður-Kóreu, er reiðubúinn að hitta Donald Trump, forseta Bandaríkjanna, að nýju, svo lengi sem hann sé tilbúinn að mæta honum með réttu hugarfari. Kim gefur bandarískum stjórnvöldum frest til loka þessa árs til þess að finna nýjan fundartíma.

Trump og Kim hittust á sögulegum leiðtogafundi í Singapúr í júní í fyrra þar sem eþir undirrituðu samkomulag um afkjarnorkuvæðingu Kóreuskaga. Þeir áttu svo annan fund í janúar í Hanoi en þeim fundi var slitið án niðurstöðu um kjarnorkuafvopnun Kóreuskagans. Trump hefur samt sem áður haldið því fram að sambandið milli sín og Kim sé gott.

Kim tók undir þau orð á ræðu sem hann hélt á norður-kóreska þinginu í gær en hann sagði einnig að eftir fundinn í Hanoi efist hann um raunverulegan áhuga Bandaríkjamanna á að bæta samskipti ríkjanna. Hann sé hins vegar reiðubúinn að gefa bandarískum stjórnvöldum lokatækifæri.

Sjálfur hefur Trump lýst yfir áhuga á að hitta Kim þriðja sinni, en frá því greindi hann fyrir fund sinn með Moon Jae-in, forseta Suður-Kóreu, í Hvíta húsinu í fyrradag.