Rússneskur dómstóll hefur dæmt Norðmanninn Frode Berg í fjórtán ára fangelsi. Hann var ákærður fyrir að hafa njósnað um rússneska kjarnorkukafbáta.
Saksóknarinn í málinu hafði farið fram á fjórtán ára fangelsi yfir Berg, sem er 63 ára. Lögmaður hans, Ilya Novikov, sagði eftir að dómurinn féll að honum verði ekki áfrýjað.
Fyrrverandi rússneskur embættismaður hafði áður verið ákærður fyrir að afhenda Berg skjöl um rússneska sjóherinn og hlaut hann þrettán ára fangelsisdóm í desember.
Berg játaði að hafa starfað sem sendill fyrir norsku leyniþjónustuna í nokkur skipti en kvaðst ekkert vita frekar um sendingarnar.