Skólum lokað vegna „trúverðugrar ógnar“

Skólar í Denver í Colorado-ríki í Bandaríkjunum eru lokaðir í dag þar sem alríkislögreglan leitar 18 ára konu sem talið er að „trúðverðug ógn“ stafi af. Konan, Sol Pais, er sögð haldin þráhyggju gagnvart skotárásinni sem framin var í Columbine-menntaskólanum árið 1999. Á laugardaginn, 20. apríl, verða akkúrat 20 ár liðin frá árásinni.

Frétt af mbl.is

Aukinn viðbúnaður við Columbine-skólann

Pais ferðaðist frá Flórída til Colorado þar sem hún keypti haglabyssu og skotfæri, samkvæmt upplýsingum frá lögreglu. „Hún er vopnuð og álitin stórhættuleg,“ segir í tilkynningu frá lögreglustjóranum í Jefferson-sýslu. Myndum af Pais hefur verið dreift um ríkið og á samfélagsmiðlum. Pais sást síðast í Colorado á mánudagskvöld.

Ógnin beinist ekki beint að Columbine-menntaskólanum, en almannavarnadeild ríkisins segir að öllum skólum í ríkinu hafi verið lokað vegna öryggisráðstafana. Ljóst er þó að töluverðs skjálfta og jafnvel ótta gætir í ríkinu þessa dagana þegar þess er minnst að 20 ár eru liðin frá því að tveir nemendur við Columbine-skólann myrtu tólf skóla­fé­laga sína og einn kenn­ara, áður en þeir tóku eigin líf á bókasafni skólans. Skotárásin var sú mannskæðasta í sögu Bandaríkjanna á þeim tíma.

• Blogga um frétt