Sigldi ölvaður upp á land

25 feta frístundabátur langt uppi á eyjunni Tørfest eftir að …
25 feta frístundabátur langt uppi á eyjunni Tørfest eftir að þeim sem honum sigldi varð á í messunni um miðnætti í gær. Hann er grunaður um ölvun við siglingar en stakk af frá læknavaktinni áður en blóðprufa náðist úr honum. Ljósmynd/Slökkviliðið í Vestfold

Norðmenn hefja páskahátíðina með ýmsu móti en einn gerði það með töluverðum látum þegar hann sigldi 25 feta frístundabáti upp á eyjuna Tørfest, skammt frá Tønsberg í Vestfold, um miðnætti í gærkvöldi á svo góðri ferð að báturinn gekk tíu metra upp á land.

Það voru kajak-ræðarar sem höfðu samband við lögreglu og tilkynntu um atburðinn. Í fyrstu var óttast að áhöfn bátsins hefði slasast við strandhöggið og hélt lögregla á vettvang ásamt sjúkraflutningamönnum auk þess sem slökkvilið var ræst út vegna hugsanlegs olíuleka og 330. flugsveit norska flughersins fór á vettvang á Sea King-björgunarþyrlu.

Stakk af úr blóðprufu

Þyrlan var fyrst á vettvang og flutti tvo menn, sem verið höfðu um borð í bátnum, á læknavakt þar sem til stóð að athuga með ástand þeirra og taka blóðprufur, en sá sem var við stjórnvölinn er grunaður um að hafa stýrt bátnum undir áhrifum.

„Einn er grunaður um að hafa siglt ölvaður en við höfum ekki getað fengið úr honum blóðprufu þar sem hann stakk af frá læknavaktinni,“ sagði Temina Sharif, lögmaður lögreglunnar í suðausturumdæminu, í samtali við Dagbladet fyrr í dag.

Hún segir mannsins nú leitað en sú leit hafi enn sem komið er ekki borið árangur. Blóðprufa fékkst hins vegar úr ferðafélaga hans og er málið nú í rannsókn.

Kenneth Olsen, aðstoðarslökkviliðsstjóri stöðvarinnar á Nøtterøy, segir athugun slökkviliðs hafa leitt í ljós að engin olía hafi lekið úr bátnum í sjóinn við áreksturinn.

Norðmenn eru mikil siglingaþjóð og í bæjum á borð við Stavanger er mun meira slegist um bátastæði en bílastæði og er jafnan mikil umferð báta um firðina í kring á sumrin, grillað og gist í eyjum og stemmningin oft nokkur meðal sjófarenda.

Þótt óvenjulegt megi kalla hjá þjóð sem lengi bannaði með lögum að selja áfengi daginn fyrir kosningar, svo kjósendur mættu ekki drukknir á kjörstað og kysu yfir sig einhverja vitleysu, er leyfilegt að hafa vínandamagn að 0,8 prómillum í blóði við stjórn báta undir 15 metra lengd á meðan mörkin eru dregin við 0,2 prómill við akstur bifreiða og stjórn stærri báta.

Líklega var þó sá sem sigldi tíu metra upp á land í Vestfold um miðnættið í gær kominn eitthvað umfram 0,8-markið.

NRK

Tønsbergs Blad (gegn áskrift)

mbl.is
Fleira áhugavert
Fleira áhugavert