Erlent | mbl | 24.4.2019 | 14:08 | Uppfært 14:37

Gengur til liðs við Brexit-flokkinn

AFP

Fyrrverandi þingmaður breska Íhaldsflokksins, Ann Widdecombe, hefur sagt skilið við breska Íhaldsflokkinn, og gengið til liðs við Brexit-flokkinn. Hefur hún tilkynnt að hún ætli í framboð fyrir flokkinn í fyrirhuguðum kosningum til Evrópuþingsins 23. maí.

Frá þessu er greint á fréttavef breska dagblaðsins Daily Telegraph, en Widdecombe var þingmaður Íhaldsflokksins 1987-2010 og átti sæti í skuggaráðuneyti flokksins 1998-2001 þar sem hún fór fyrst með heilbrigðismál og síðan innanríkismál.

Frétt af mbl.is

Margir vilja Farage sem leiðtoga

Tilefni ákvörðunar Widdecombe er hvernig Theresa May, forsætisráðherra Bretlands og leiðtogi Íhaldsflokksins, hefur haldið á málum varðandi útgöngu landsins úr Evrópusambandinu en Widdecombe er mikill stuðningsmaður útgöngunnar.

Widdecombe sagðist ætla að kjósa frambjóðanda Íhaldsflokksins í sveitarstjórnarkosningunum í byrjun maí en síðan bjóða sig fram fyrir Brexit-flokkinn síðar í þeim mánuði. Tímabært væri að framkvæmt væri það sem meirihlutinn greiddi atkvæði með í þjóðaratkvæði í Bretlandi sumarið 2016 og landið segði skilið við Evrópusambandið (Brexit).

Frétt af mbl.is

Brexit-flokkurinn með mest fylgi

Widdlecombe er vel þekkt í Bretlandi og þykir segja skoðanir sínar umbúðalaust. Skammt er síðan hún lýsti því sjónarmiði sínu í sjónvarpi að Bretland hefði nú um stundir versta forsætisráðherra síðan Anthony Eden gegndi embættinu skömmu eftir miðja síðustu öld, versta leiðtoga stjórnarandstöðunnar í sögu Verkamannaflokksins og versta þing Bretlands frá dögum Olivers Cromwell á 17. öld.

Skoðanakannanir hafa bent til þess að Brexit-flokkurinn, sem var formlega stofnaður fyrr í þessum mánuði, fái hugsanlega mest fylgi allra flokka í Bretlandi í kosningum til Evrópuþingsins en leiðtogi hans er Nigel Farage, þingmaður á Evrópuþinginu og fyrrverandi leiðtogi Breska sjálfstæðisflokksins.