Malasíski fjallgöngugarpurinn sem bjargað var eftir að hafa lifað af tvær nætur í grennd við topp Annapurna-fjallssins, er enn í lífshættu að sögn lækna.
Fjallgöngugarpurinn Chin Wui Kin var fluttur með þyrlu til Katmandú, höfuðborgar Nepal daginn eftir að fjórir þaulvanir sjerpar náðu að flytja hann í búðir neðar í fjallinu í áhættusamri björgunaraðgerð.
„Púls hans var veikur og líkamshitinn lágur þegar við fengum hann. Hann þjáist af alvarlegri ofkælingu og er með kalsár á bæði höndum og fótum,“ hefur AFP-fréttaveitan eftir Sanij Singh lækni á bráðadeild Mediciti sjúkrahússins.
„Ástand hans er alvarleg, en við erum að gera allt sem við getum.“
Chin komst upp á topp fjallsins, sem er 8.100 metra hátt, á þriðjudag. Hann komst hins vegar ekki niður í búðir sem eru um kílómetra neðar ásamt hópinum sem hann var með í göngunni og þegar leiðsögumaður Chin kom í búðirnar án hans hófst leit að honum.
Björgunarþyrla kom svo auga á Chin í gærmorgun, þar sem hann veifaði út í loftið í brekku um 600 metra frá toppi fjallsins.
Í kjölfarið voru fjórir þaulvanir sjerpar voru sendir af stað í áttina til Chin. Hann var hálfmeðvitundarlaus er þeir komu að, en þáði þó vatn áður en hófust handa við að koma honum niður.
Sérfræðingar hafa sagt það „kraftaverk“ að Chin hafi lifað af svo langa dvöl í kuldanum við topp fjallsins, en Annapurna er sagt eitt hættulegasta fjall heims en þar farast hlutfallslega fleiri fjallgöngumenn en á Everest. Níu fjallgöngumenn frá Suður-Kóreu fórust á fjallinu í október þegar þeir hröpuðu af kletti í blindbyl.