Ástandið í Jemen, sem er eitt fátækasta ríki Mið-Austurlanda, hefur verið hræðilegt síðan borgarastyrjöld braust þar út árið 2015. Í þriðju stærstu borg Jemen, Taiz, hafa bardagarnir verið einna mestir. Leyniskyttur fylgjast með götum og öðrum opnum svæðum og almennir borgarar eru í mikilli hættu á að verða fyrir skotum.
Taiz er því stórhættuleg fyrir blaðamenn að sækja heim. Breska ríkisútvarpið, BBC, fékk nýlega myndefni sem sýnir eyðilegginguna í borginni og þann ótta sem íbúar borgarinnar búa við.
Rétt er að vara viðkvæma við meðfylgjandi myndbandi.
Að minnsta kosti 6.800 saklausir borgarar hafa látist í borgarastyrjöldinni í Jemen.
Þá hafa tæplega 11.000 særst í átökunum, að sögn talsmanna Sameinuðu þjóðanna. Þúsundir til viðbótar hafa látist af völdum sjúkdóma sem hefði mátt koma í veg fyrir, t.d. vegna vannæringar.