„Julian Assange hefur sætt langvinnum sálfræðilegum pyntingum.“ Þetta fullyrðir Nilz Melzer, sérstakur sendifulltrúi Sameinuðu þjóðanna um pyntingar og sakar hann yfirvöld í Bandaríkjunum, Bretlandi, Ekvador og Svíþjóð um samstilltar ofsóknir gegn stofnanda WikiLeaks. Segir hann fjölmiðla, samfélagsmiðla, dómara og háttsetta stjórnmálamenn hafa tekið þátt í þeirri meðferð.
Assange dvaldi í sendiráði Ekvadors í sjö ár en stjórnvöld í Ekvador sviptu hann hæli í apríl. Breska lögreglan handtók Assange og hefur hann setið í öryggisfangelsi í tæpa tvo mánuði. Assange hefur verið ákærður fyrir að brjóta gegn njósnalöggjöf Bandaríkjanna vegna birtingar á leynilegum hernaðar- og stjórnsýslugögnum.
Melzer heimsótti Assange í fangelsið 9. maí síðastliðinn og segist hafa séð „yfirþyrmandi“ sönnunargögn sem sýna fram á að hann hafi orðið fyrir stöðugri, alvarlegri, miskunnlausri eða niðurlægjandi meðferð eða refsingu svo árum skiptir. „Samanlögðum áhrifum þess er einungis hægt að lýsa sem sálfræðilegum pyntingum,“ segir Melzer.
Að hans mati sýnir Assange öll einkenni þess að hafa orðið fyrir sálfræðilegum pyntingum, til að mynda óhóflega streitu, stöðugan kvíða og mikið sálfræðilegt áfall.
Assange, var of veikur í til að geta tekið þátt í réttarhöldum í gær vegna framsalsbeiðni bandarískra stjórnvalda gegn honum, en Assange hafði átt að vera viðstaddur úr fangelsinu í gegnum myndbandstengingu.
Melzer er mótfallinn því að Assange verði framseldur til Bandaríkjanna.