Indverski flugherinn hefur nú bæst í hóp þeirra sem leita átta fjallgöngumanna sem er saknað á næst hæsta fjalli landsins, Nanda Devi, í Himalajafjöllunum. Fjórir Bretar eru í hópnum, tveir Bandaríkjamenn, Indverji og Ástrali, að því er segir í frétt BBC.
Hópurinn hóf að klífa Nanda Devi 13. maí og þegar hópurinn skilaði sér ekki á tilsettum degi í grunnbúðir á föstudag var ákveðið að hefja eftirgrennslan. Að sögn yfirvalda eru sjáanleg ummerki eftir snjóflóð í hlíðum fjallsins sem er 7.816 metrar að hæð.
Leit hefur nú verið hætt og þykja litlar líkur á að hópurinn sé enn á lífi.
Björgunarsveitir ætluðu að hefja leit í gær en hætt var við vegna þess hve vont veðrið var á þessum slóðum. Tvær þyrlur indverska flughersins hófu leit snemma í morgun auk þess sem björgunarsveitarfólk hefur verið kallað út að nýju.
Leiðangursstjórinn er breski fjallaleiðsögumaðurinn Martin Moran, en fyrirtæki hans í Skotlandi, Moran Mountain, hefur farið í marga leiðangra í indverska hluta Himalajafjallanna.
Aðrir í hópnum eru: John McLaren, Rupert Whewell og Richard Payne frá Bretlandi, Bandaríkjamennirnir Anthony Sudekum og Ronald Beimel, auk Ruth McCance en hún er frá Ástralíu og indverski leiðsögumaðurinn Chetan Pandey.