Öryggissveitir í Súdan hafa beitt táragasi og skotið á mótmælendur í þeim tilgangi að tvístra þeim. Mótmælendur hafa komið hafa upp vegartálmum í höfuðborginni Khartoum. Að minnsta kosti fjórir eru látnirí aðgerðunum.
Mótmælendur hafa hvatt íbúa til að sýna af sér borgaralega óhlýðni frá og með deginum í dag til að gera herforingjastjórninni sem erfiðast fyrir að ná tökum á stjórnmálaástandinu í landinu.
Mótmælendur krefjast þess að borgaraleg stjórn taki við völdum af herforingjastjórninni sem tók yfir eftir að Omar al-Bashir hrökklaðist úr embætti forseta í apríl. Mótmælendur hafa komið sér fyrir á torgi við höfuðstöðvar hersins og nú bætt við vegartálmum. Aðgerðir hersins gegn mótmælendum hófust á mánudag og fara stigmagnandi.
Stjórnarandstaðan fullyrðir að yfir 100 manns hafi látið lífið í aðgerðum stjórnvalda gegn mótmælendum en heilbrigðisráðuneytið fullyrðir að „ekki fleiri en 46“ hafa látið lífið í aðgerðunum.
Bankastarfsmenn, flugvallarstarfsmenn og rafvirkjar voru handteknir skömmu áður en þeir hugðust leggja niður störf og taka þátt í mótmælum, að sögn talsmanns stærsta mótmælendahóps stjórnarandstöðunnar.
Alþýðusamband Súdans, sem 17 verkalýðsfélög heyra undir, fullyrða að félagsmönnum þess hafi verið hótað af yfirvöldum til að koma í veg fyrir að þeir leggi niður störf.
Herforingjastjórnin þvertekur fyrir að hafa beitt afli gegn mótmælendum.