19 manns hið minnsta hafa farist flóðum í suðurhluta Kína að því er kínverska ríkisfréttaveitan Xinhua greinir frá.
Þúsundir hafa orðið strangaglópar vegna mikilla rigninga og í Guangxi héraði, sem er við landamæri Kína og Víetnam hafa flóð í sex borgum valdið því að 12 manns hið minnsta hafa farist. Hefur Xinhua eftir kínversku almannavörnunum að flóðin á því svæði hafi haft áhrif á líf rúmlega 570.000 manna.
Hundruð heimila og þúsundir hektara af uppskeru hafa eyðilagst. Talið er að rigningarnar haldi áfram næstu daga með tilheyrandi flóðum.
Í nágrannahéraðinu Guangdong, hafa að minnsta kosti sjö manns farist og eins til viðbótar er saknað eftir að vegir eyðilögðust og hús hrundu í úrhellisrigningu.