Bandarísk stofnun sem hefur eftirlit með stjórnvöldum hefur lagt til að Kellyanne Conway, einn af aðstoðarmönnum Bandaríkjaforseta, verði sagt upp störfum fyrir að brjóta reglur með því að taka þátt í kosningabaráttu stjórnmálamanna.
Að sögn stofnunarinnar braut Conway hin svokölluðu Hatch-lög þar sem ríkisstarfsmönnum er meinað að taka þátt í kosningabaráttu fyrir stjórnmálamenn. Conway er sögð hafa brotið lög í þó nokkur skipti og kölluð „síbrotamaður“.
Hvíta húsið hefur vísað tillögunni á bug og segja hana „afar gallaða“ og „án fordæmis“.
Conway kom fram í sjónvarpsviðtali árið 2017 þegar kosningar fóru fram í ríkinu Alabama til öldungadeildar Bandaríkjaþings. Þar ræddi hún um frambjóðendur sem hún bæði studdi og var á móti.