Krónprins Sádi-Arabíu tekur undir með Bandaríkjamönnum og segir Írani ábyrga fyrir árásum sem gerðar voru á tvö olíuskip í Ómanflóa, ef marka má orð sem Mohammed bin Salman lét falla í viðtali við Asharq al-Awsat.
Í viðtalinu segist krónprinsinn ekki hika við að tækla hvers kyns ógnir gegn ríkinu.
„Írönsk stjórnvöld virtu ekki veru japanska forsætisráðherrans í Tehran og svöruðu diplómatískri viðleitni hans með árás á tvö olíuskip,“ segir prinsinn í viðtalinu, en annað skipanna sem varð fyrir árás var japanskt.
Áhöfnum tveggja tankskipa var bjargað í Ómanflóa á fimmtudag eftir sprengingar sem urðu til þess að eldar kviknuðu í þeim. Ekki var vitað hvað olli sprengingunum en grunur lék á að skipin hefðu orðið fyrir árásum.
Sprengingarnar urðu til þess að heimsmarkaðsverð á olíu hækkaði verulega og óttast var að þær myndu auka spennuna í Mið-Austurlöndum. Annað skipanna, Front Altair, er í eigu norsks fyrirtækis og hitt, Kokuka Courageous, í eigu japansks skipafélags.
https://www.mbl.is/frettir/erlent/2019/06/13/segir_irana_abyrga_fyrir_aras/