Carola Rackete, skipstjóri björgunarskipsins Sea Watch 3 sem var handtekin um leið og hún sigldi með flóttafólk til hafnar á eyjunni Lampedusa í fyrradag, segist hafa farið gegn fyrirmælum lögreglu af ótta við að flóttafólkið um borð fyrirfæri sér.
Sea Watch 3 hafði verið meinað að sigla til hafnar af ítölskum yfirvöldum og hafði verið pattstaða í tvær vikur milli skipsins og lögreglunnar skammt frá eyjunni Lampedusa í Miðjarðarhafi.
Rackete bað áhöfnina um borð í skipi lögreglu afsökunar og neitaði ásökunum innanríkisráðherrans Matteo Salvini um að hún hafi reynt að sökkva báti lögreglunnar.
Rackete segir ákvörðun sína um að koma að landi á Ítalíu ekki vera „ofbeldisverk“ og að markmið hennar hafi einfaldlega verið að koma „þreyttu og örvæntingarfullu“ fólki á þurrt land.
Salvini sagði Rackete vera bæði „sjóræningja“ og „útlaga“. Hún er nú í stofufangelsi á meðan hún bíður þess að vera leidd fyrir dómara. Verði hún sakfelld fyrir dómstólum gæti hún átt yfir höfði sér allt að 10 ára fangelsi.
Um borði í skipi Rackete voru 53 flóttamenn sem bjargað var við strendur Líbíu fyrr í mánuðinum.
Samkvæmt BBC sagði Rackete í viðtali sem birtist í ítölsku dagblaði í dag að hún hafi aldrei ætlað að stofna neinum í hættu og hafi sýnt dómgreindarbrest þegar hún reiknaði fjarlægð lögreglubátsins sem hún sigldi á.
Hún sagðist hafa óhlýðnast fyrirmælum lögreglu vegna þess að sumir um borð hefðu þá þegar byrjað að stunda sjálfsskaða og hún óttaðist sjálfsvíg á meðal flóttafólksins ef það kæmist ekki á land.
„Dögum saman hafði áhöfnin skipst á vöktum, líka á nóttunni, af ótta við að einhver myndi kasta sér fyrir borð. Fyrir þau sem ekki kunna að synda þýðir það sjálfsmorð,“ sagði Rackete í viðtalinu.
Talsmaður Sea-Watch, Haidi Sadik, sagði við BBC að flóttafólkið fengi nú viðeigandi umönnun í Lampedusa. Hún fullyrðir að Rackete hafi fylgt bæði sjórétti og alþjóðlegum mannréttindalögum.
„Þegar þú bjargar fólki á hafi úti verður þú að koma því í næstu öruggu höfn,“ sagði Sadik.
Þá sagði hún ákvörðunina um að koma að landi á Ítalíu ekki hafa verið pólitískt uppátæki heldur hafi hún verið að framfylgja skyldu sinni til að bjarga fólki.