Stjórnvöld í Íran munu „innan nokkurra klukkustunda“ hefja framleiðslu á auðguðu úrani umfram það sem ríkinu er heimilt að framleiða, samkvæmt kjarnorkusamningnum sem gerður var við Íran 2015. Frá þessu greindi fulltrúi Íransstjórnar í sjónvarpsávarpi í morgun.
Það merkir að Íran mun búa yfir meira en 300 kílóum af auðguðu úrani sem er notað sem eldsneyti í kjarnorkuver, en 1.050 kíló eru talin nauðsynleg til þess að búa til kjarnorkuvopn.
Spennan í samskiptum Bandaríkjanna og Írans hefur farið stigvaxandi síðustu vikur og tilkynnti Kjarnorkumálastofnun Sameinuðu þjóðanna fyrir helgi að hún hygðist halda neyðarfund vegna kjarnorkuáætlunar Írans í næstu viku.
Þetta er annar skilmáli samningsins sem írönsk stjórnmál brjóta eftir að Íran jók framleiðslu auðgaðs úrans þegar Donald Trump, forseti Bandaríkjanna, ákvað að beita landið efnahagsþvingunum. Evrópuríki sem eru aðilar að samningnum við Íran hafa varað við því að brot á skilmálum hans mun hafa afleiðingar.
Utanríkisráðherra Írans, Abbas Aragchi, sagði á blaðamannafundi í morgun að fleiri skilmálar samningsins verði brotnir ef ríkin sem eiga aðild að samningnum komast ekki að samkomulagi innan tveggja mánaða.
Bretland, Þýskaland, Frakkland, Kína og Rússland eru enn aðilar að umræddum samningi. Í gærkvöldi samþykktu stjórnvöld í Frakklandi og Íran að endurskoða aðstæður til viðræðna um samninginn. Emmanuel Macron Frakklandsforseti hringdi í Hassan Rouhani, forseta Írans, í gærkvöldi þar sem hann lýsti þungum áhyggjum vegna mögulegra afleiðinga sem gætu orðið ef kjarnorkusamningnum yrði alfarið rift.