Lögregla við Niagara-fossana segir karlmann sem féll niður fossana, sem eru 57 metra háir, hafa lifað af fall í straumþunga ána fyrir neðan. BBC greinir frá.
Greindi lögreglan frá því á Twitter að fólk á svæðinu hafi tekið eftir manninum klifra yfir vegg við fossana um fjögurleytið í í gærmorgun áður en hann féll svo ofan af klettinum við fossinn.
Eftir leit neðan við fossinn fann lögregla svo manninn „sitjandi á steini“ með meiðsli sem ekki teljast lífshættuleg. Maðurinn, sem ekki hefur verið nafngreindur, var því næst fluttur á sjúkrahús.
@NiagParksPolice 0400 responded to male in crisis brink of Horseshoe Falls. On arrival male was observed to climb over retaining wall and swept over falls. Male was found sitting on rocks after search of lower river w/non life threatening injuries. Trans. to hosp. further care
— Niagara Parks Police (@NiagParksPolice) July 9, 2019
Var manninum lýst sem svo að hann væri „í hættu staddur“ nálægt brún Horseshoe-fossins, sem er stærstur þriggja fossa í Niagara-fossunum. Hann fannst svo við árbakkann nærri útsýnissvæði að sögn blaðsins Buffalo News.
Borgarstjórinn Jim Diodati sagði í samtali við blaðið að hann teldi einstaklega mikið vatnsmagn í ánni hafa átt sinn þátt í því að maðurinn lifði fallið af. „Þegar meira vatn er í Erie-vatninu sem rennur kröftuglega yfir í Ontario-stöðuvatnið þá eru meiri líkur á að ná að forðast klettana undir Horseshoe-fossinum,“ sagði Diodati.
„Eina leiðin til að lifa svona fall af er að fara fram hjá stóru klettunum þar fyrir neðan. Í tilfelli þessa einstaklings vona ég að hann líti á það sem blessun.“
Tugir milljóna gesta heimsækja Niagara-fossana, sem eru á landamærum Bandaríkjanna og Kanada árlega.
Margir hafa farist í gegnum tíðina eftir að hafa fallið niður fossana, en nokkrir hafa þó áður lifað fallið af.