Til óeirða kom í París og Marseille og víðar í Frakklandi í gærkvöldi, eftir að Alsír tryggði sér farmiða í undanúrslitaleik Afríkukeppninnar í knattspyrnu. Frönsk stjórnvöld segja uppþotið „óásættanlegt“, en búðir í París voru rændar í múgæsingi sem skapaðist í óeirðunum.
Í frétt AFP segir einnig að kona hafi látið lífið í Montpellier í gærkvöldi, eftir að stuðningsmaður alsírska liðsins sem var að fagna úrslitunum missti stjórn á bifreið sinni á miklum hraða og keyrði á konuna og barn hennar, sem lifði áreksturinn af.
Lögregla notaði táragas til þess að dreifa þúsundum alsírskra óeirðaseggja á Champs-Elysees í París og við höfnina í Marseille. Brotist var inn í tvær búðir á Champs-Elysess, meðal annars Ducati-mótorhjólabúð og þaðan gripu fótboltabullurnar með sér hjálma, hanska og jafnvel mótorhjól.
Alls voru 73 handteknir í óeirðunum, sem Cristophe Castener innanríkisráðherra Frakklands segir með öllu óásættanlegar.