Fyrrverandi forseti Perú, Alejandro Toledo, hefur verið handtekinn í Bandaríkjunum. Handtakan kemur í kjölfarið á framsalsbeiðni frá því í mars á síðasta ári.
Toledo er sakaður um að hafa tekið við andvirði 20 milljóna Bandaríkjadala í mútur frá brasilíska byggingafyrirtækinu Odebrecht þegar hann gegndi embætti á árunum 2001 til 2006.
Toledo, sem er 73 ára, neitar ásökunum og segir þær komnar frá pólitískum andstæðingum sínum.
Toledo er einn af þremur fyrrverandi forsetum landsins sem er flæktur í stórfellt spillingarmál. Hinir tveir eru Ollanta Humala og Alan García. Þeir hafa, líkt og Toledo, neitað öllu. Garcia framdi sjálfsvíg þegar lögregla hugðist handtaka hann fyrr á árinu.
Byggingafyrirtækið hefur viðurkennt að hafa greitt 29 milljónir dollara í mútufé til stjórnvalda í Perú á þremur kjörtímabilum.