Ríkisfjölmiðill Íran birti í dag myndband af því þegar íranski herinn hertók breska olíuskipið Stena Impero í gær. Jeremy Hunt, utanríkisráðherra Breta, hvatti í dag Írana til að láta af hertökunni, sem hann sagði ólöglega og vekja upp „mjög alvarlegar spurningar“ um öryggi breskra skipa og annarra sem eiga leið um Hormuz-sund.
Bresk stjórnvöld kyrrsettu íranskt olíuskip við Gíbraltar 4. júlí þar sem talið var að það hygðist sigla með olíu til Sýrlands í trássi við reglur Evrópusambandsins. Hafa Íranir í kjölfarið reynt að svara í sömu mynt og krafist þess að skipið, Grace 1, verði leyft að halda þaðan.
Írönsk stjórnvöld þvertaka hins vegar fyrir að um hefndaraðgerð sé að ræða en þeir segja skipið hafa brotið gegn alþjóðlegum hafréttarlögum. Eru stjórnendur skipsins sakaðir um að hafa hunsað neyðarkall frá fiskibáti sem það hafi lent í árekstri við.
Hluti af áróðursherferð Írana
Þótt Stena Impero sigli undir breskum fána, er skipið í sænskri eigu. Rouzbeh Parsi, Mið-Austurlandafræðingur við Háskólann í Lundi, segir í samtali við sænska ríkissjónvarpið, SVT, að ekki sé óvenjulegt að „byltingarverðir“ Íranshers, eins og þeir nefna sig, láti frá sér eigin myndbönd sem þessi.
„Frá þeirra sjónarhóli er það fágaður og vel undirbúinn áróður að deila svo frökkum myndböndum, og í þessu tilfelli á að sýna tæknilega getu hersins til að ná tökum á faratæki til sjós,“ segir Parsi. Hann segir að byltingarverðirnir haldi úti fjölmiðladeild sem útbúi myndbönd, myndir og annað til að styrkja málstað sinn í fjölmiðlum.