Trump í mál vegna skattframtals
Setja bókamerki
Donald Trump Bandaríkjaforseti hóf í gær málshöfðun til að koma í veg fyrir að yfirvöld í New York-ríki afhendi þingnefnd fulltrúadeildar Bandaríkjaþings skattskýrslur hans. Sakaði lögfræðingur Trumps nefndina, þar sem demókratar eru í meirihluta, um „forsetaáreitni“.
Fullyrða lögfræðingar forsetans að lög, sem New York-ríki samþykkti fyrr í mánuðinum og heimila þingnefndinni aðgang að skattskýrslum Trumps, brjóti gegn stjórnarskrárvörðum réttindum forsetans. Lögin hafi verið samþykkt til þess eins að ná fram hefnd gagnvart forsetanum vegna stefnumála hans, stjórnmálaskoðana og málfrelsis, m.a. vegna þeirrar afstöðu sem hann tók í framboði sínu árið 2016, að því er segir í málshöfðuninni.
Trump hafi því neyðst til að höfða mál til að tryggja lagalegan rétt sinn.
Reuters-fréttaveitan segir nefndina ekki hafa tjáð sig um málshöfðunina, en saksóknari New York, Letitia James, sagði í yfirlýsingu að hún væri þess fullviss að nýja löggjöfin teldist lögleg. „Við munum verja hana af krafti gegn öllum málshöfðunum,“ sagði James.
Hefð er fyrir því að forsetaframbjóðendur geri skattskýrslur sínar opinberar í kosningabaráttu sinni, en Trump hefur ítrekað neitað að gera slíkt. Nefndin hefur hins vegar ítrekað farið fram á að fá skattskýrslurnar afhentar til að geta varpað ljósi á viðskipti forsetans.
Bandaríska fjármálaráðuneytið hefur líka neitað að afhenda skýrslurnar þrátt fyrir alríkislög sem kveða á um að ráðuneytið skuli afhenda slík gögn fari nefndin fram á það. Höfðaði nefndin mál gegn ráðuneytinu fyrr í mánuðinum í því skyni að fá skattskýrslur sl. sex ára afhentar, en ráðuneytið hefur sagt nefndina hafa engan lagalegan tilgang með því að fara yfir skattskýrslur Trump.
Kostnaður meiri en milljón á fermetra
„Hvílir mikil leynd yfir þessu öllu“
Skar höfuðleðrið af íslenskri konu
Krefjast stöðvunar framkvæmda
Vélsleðaslys: Þyrlan kölluð út á mesta forgangi
Árshátíð ríkislögreglustjóra haldin í Tékklandi
Æskuvinur Íslendings myrtur í Noregi
Tveir í bílnum sem lenti utan vegar