Ítalska lögreglan hefur nú hafið rannsókn á því hvers vegna lögreglumenn hafi bundið fyrir augu annars bandarísku ferðmannanna sem yfirheyrðir hafa verið vegna morðs á ítölskum lögregluþjóni. Fréttastofa CNN greinir frá þessu og birtir mynd af ungum manni, sem sagður er vera annar ferðamannanna. Tveir lögreglumenn sjást standa yfir honum þar sem hann er handjárnaður og með bundið fyrir augu á lögreglustöð.
Ítalska dagblaðið Corriere della Sera birti myndirnar fyrst og hefur ítalska lögreglan staðfest trúverðugleika myndanna og er rannsókn nú hafinn á því af hverju bundið hafi verið fyrir augu hans.
Ferðamennirnir tveir hafa verið yfirheyrðir vegna morðs á lögregluþjóninum, en hann var myrtur snemma á föstudagsmorgun. Samkvæmt ítölskum fjölmiðlum ætluðu ferðamennirnir, Gabriel Natale Hjorth 18 ára og Finnegan Lee Elder 19 ára, að kaupa sér eiturlyf en lentu í útistöðum við dópsalann. Lögregla var kölluð á vettvang og eftir átök var lögregluþjónninn Mario Cerciello Rega stunginn til bana.
Hefur Elder játað á sig morðið á lögreglumanninum, sem var stungin átta sinnum með hnífi og var úrskurðaður látinn á vettvangi.