Egyptar sýndu í gær gyllta kistu drengfaraósins Tútankamons, sem er nú verið að lagfæra í fyrsta sinn síðan grafhýsi faraósins var uppgötvað árið 1922.
Lagfæring kistunnar hófst um miðjan júlí þegar kistan var færð á egypskt safn (e. Grand Egyptian Museum) úr grafhýsi Tútankamons í Konungadalnum í Lúxor.
„Við erum að sýna ykkur einstaka sögulega mannasmíð, ekki bara fyrir Egyptaland heldur heiminn allan,“ sagði minjamálaráðherra Egyptalands, Khaled el-Enany, á blaðamannafundi á safninu í morgun.
Kista Tútankamons verður sýnd ásamt fleiri minjum úr grafhýsi hans út næsta ár. Er áætlað að lagfæring kistunnar muni taka um átta mánuði.
Talið er að Tútankamon hafi látist fyrir um 3.000 árum og var hann líklega á táningsaldri þegar hann andaðist.
Faðir hans, Akhenaten, olli miklum usla í Egyptalandi vegna trúarskoðana sinna og féll valdatíð Tútankamons í skugga hins alræmda Akhenaten. Drengfaraóinn þótti því ekki vera á meðal fræknustu faraóa Egyptalands hins forna, en þegar breski fornleifafræðingurinn Howard Carter uppgötvaði grafhýsi hans á fyrri hluta síðustu aldar vöktu þær gersemar sem þar fundust mikla athygli um heim allan.
Tútankamon er því í dag á meðal best þekktu egypsku faraóanna.
Kista Tútankamons er til þess gerð að varðveita múmíu drengfaraósins fyrir hita og raka, en vegna fjölda ferðamanna sem heimsækja gröf hans hefur kistan orðið fyrir skaða og múmían er berskjaldaðri en áður.