Erlent | mbl | 14.8.2019 | 6:14 | Uppfært 6:32

Flugumferð að komast í eðlilegt horf

Farþegar bíða eftir að innrita sig í flug frá alþjóðaflugvellinum í Hong Kong í morgun. AFP

Opnað hefur verið aftur fyrir flugumferð um alþjóðaflugvöllinn í Hong Kong eftir að flugi um hann var aflýst tvo daga í röð. Þúsundir mótmælenda hafa safnast þar saman undanfarna daga og ríkti mikil ringulreið á flugvellinum í gærkvöldi og nótt er kom til átaka milli mótmælenda og óeirðalögreglu.

Gerðu mótmælendur m.a. aðsúg að þremur mönnum, sem reyndust vera kínverskir lögreglumenn. Lögreglan í Hong Kong hefur viðurkennt að lögreglumenn hafi dulbúist sem mótmælendur til að reyna að hafa stjórn á aðstæðum.

Frétt af mbl.is

Ringulreið á flugvellinum í Hong Kong

Hundruðum flugferða var aflýst í gær eftir að mótmælendur fylltu brottfararsalinn og var í kjölfarið lokað á frekara flug. BBC segir að svo virðist sem flugumferð sé nú að mestu komin í samt lag, þótt enn sé eitthvað um tafir og aflýst flug.

Flugvallaryfirvöld segjast hafa fengið tímabundna heimild til að banna mótmælendur frá vissum svæðum á flugvellinum og muni það eiga við öll svæði sem ekki séu sérstaklega tilgreind til mótmæla.

Mótmælt er nú í Hong Kong tíundu vikuna í röð, en mótmælin hófust vegna óánægju með lagafrumvarp sem átti að heimila framsal fólks til meginlands Kína.

Alþjóðaflugvöllurinn í Hong Kong er einn fjölfarnasti flugvöllur í heiminum. Mótmælin þar hafa að mestu farið friðsamlega fram, utan átökin í gærkvöldi.