Réttarmeinafræðingar í Mexíkó hafa náð að bera kennsl á 44 lík sem fundust grafin ofan í brunni skammt frá borginni Guadalajara í Jalisco-ríki. Líkamsleifunum hafði verið komið fyrir í 119 svörtum pokum.
Líkin fundust fyrr í þessum mánuði eftir að íbúar í nágrenninu fóru að kvarta undan óþef.
Glæpagengi hafa háð blóðuga baráttu í Jalisco og þetta er í annað sinn á þessu ári sem fjöldagröf finnst í ríkinu. Fram kemur á vef BBC, að líkin hafi verið sundirlimuð og þurftu yfirvöld að setja bútana saman til að hægt væri að bera kennsl á líkin. Enn eru þó margir líkamshlutar sem ekki hefur náðst að bera kennsl á.
Samtök á svæðinu sem vinna við það að finna týnda einstaklinga hafa skorað á stjórnvöld að senda fleiri sérfræðinga á vettvang til að leggja verkefninu lið. Þau segja að réttarmeinafræðingarnir á staðnum séu að drukkna í verkefnum og búi þar að auki ekki yfir viðunandi kunnáttu til að ljúka verkinu.