Ítölsk lögregluyfirvöld hafa ákært mann fyrir manndráp eftir að hann varð föður sínum að bana er þeir voru við villisvínaveiðar. BBC greinir frá.
Atburðurinn átti sér stað í gær í nágrenni bæjarins Postiglione í Salerno-héraði á suðurhluta Ítalíu.
Maðurinn skaut af byssu sinni þegar hann heyrði skrjáfa í gróðri og varð var við skugga. Ekki vildi hins vegar betur til en svo að skotið lenti í maga föður hans. Hann lét vita um leið hvað hefði gerst og reyndi að halda föður sínum á lífi þar til hjálparsveitir komu á staðinn.
Læknar gátu hins vegar ekki bjargað lífi föðurins, Martino Gaudioso.
Að sögn ítalskra fjölmiðla voru feðgarnir við veiðar í þjóðgarði þar sem veiðar eru bannaðar og lagði lögregla hald á rifflana sem þeir voru með.
Michela Vittoria Brambilla, formaður ítölsku náttúruverndarsamtakanna, sagði í gær ástandið víða minna á „villta vestrið“.
„Þetta er raunverulegt neyðarástand,“ sagði Brambilla.
Umhverfisráðherra Ítalíu, Sergio Costa, lagði í október í fyrra til að bann yrði lagt við veiðum á sunnudögum, en skömmu áður hafði 18 ára drengur látist í slíku slysi nálægt landamærum Frakklands. Fyrir lok þess mánaðar höfðu tveir til viðbótar látið lífið við sambærilegar kringumstæður, karlmaður á sextugsaldri og drengur á tvítugsaldri.