Leigubíll ók á mótmælendur í Hong Kong

Ökumaður leigubíls keyrði niður mótmælendur í Hong Kong í dag. Mótmælin sem hafa nú staðið yfir í tæpar 18 vikur, verða sífellt ofbeldisfyllri. 

Lög­regl­a beitti tára­gasi gegn grímu­klædd­um mót­mæl­end­um í morg­un eft­ir að tugþúsund­ir manns mót­mæltu grímu­banni yf­ir­valda sem er hluti neyðarlaga sem sett voru í fyrra­dag. 

Samvæmt CNN er atvikið með leigubílinn eitt það blóðugasta síðan mótmælin hófust. Bílinn ók inn í hóp mótmælenda og tók skarpa beygju til vinstri. Á ljósmyndum má sjá mann liggja við hlið leigubílsins á meðan múgur sparkar í hann. Samkvæmt lögreglu var ökumaðurinn meðvitundarlaus þegar honum var bjargað frá margmenninu, en aðdragandi atviksins er óljós. 

Ökumaður leigubílsins fær aðhlynningu. Hann var meðvitundarlaus þegar honum var ...
Ökumaður leigubílsins fær aðhlynningu. Hann var meðvitundarlaus þegar honum var bjargað frá múginum. AFP

Samkvæmt heilbrigðismálayfirvöldum í borgríkinu voru fjórir fluttir slasaðir á sjúkrahús eftir atvikið. Einn var með minniháttar áverka en fjórir eru þungt haldnir, þeirra á meðal ökumaður leigubílsins.

Upphaf mótmælanna má rekja til laga­frum­varps sem heim­ila átti framsal meintra brota­manna til meg­in­lands Kína. Þau þróuðust síðan í ákall eftir auknum lýðræðis­umbótum og að kín­versk stjórn­völd létu sjálfs­stjórn­ar­borg­ina af­skipta­lausa. Mót­mæl­in náðu nýj­um hæðum á mánu­dag­inn, þegar 70 ára af­mæli alþýðulýðveld­is­ins Kína var fagnað.

Mótmælandi fær aðhlynningu eftir að leigubíll keyrði niður hóp mótmælenda.
Mótmælandi fær aðhlynningu eftir að leigubíll keyrði niður hóp mótmælenda. AFP

Mótmælin í dag voru ekki heimiluð af yfirvöldum og beitti lögregla táragasi og piparúða til að sundra mótmælendahópinn. Sumir köstuðu múrsteinum og bensínsprengjum og voru nokkrir handteknir.

Mótmælendur unnu mikil skemmdarverk á leigubílnum.
Mótmælendur unnu mikil skemmdarverk á leigubílnum. AFP
Ökumaður leigubílsins fær aðhlynningu.
Ökumaður leigubílsins fær aðhlynningu. AFP
mbl.is