Ítalska þingið hefur samþykkt að fækka þingmönnum í efri og neðri deild þingsins um rúman þriðjung. Á fækkunin að stuðla að hagræðingu í rekstri þingsins.
Neðri deild þingsins samþykkti að fækka þingmönnum úr 630 í 400 og efri deildin að fækka þingmönnum úr 315 í 200.
Fækkunin er hluti af stjórnarsáttmála Fimmstjörnuhreyfingarinnar, sem nýlega myndaði ríkisstjórn með sósíaldemókrötunum í Lýðræðisflokknum. Aðgerðirnar eiga að „straumlínulaga þingið og spara hundruð milljóna evra í launakostnað og önnur fjárútgjöld“.
Stjórnmálakrísa hefur ríkt á Ítalíu síðustu mánuði. Í ágúst lýsti Salvini innanríkisráðherra því yfir að hann ætlaði að draga sig út úr stjórnarsamstarfi við Fimmstjörnuhreyfinguna og boða til kosninga, en samstarfið hafði verið í meira lagi erfitt, þar sem flokkarnir voru lítt samstíga um ýmis stefnumál. Fimmstjörnuhreyfingunni og Lýðræðisflokknum tókst að lokum að mynda ríkisstjórn, en ítalskir fjölmiðlar hafa lýst þreifingum flokkanna tveggja sem „klikkuðustu krísu sögunnar“.
Aðgerðirnar hafa verið gagnrýndar á þeim forsendum að þær veiki lýðræðið og auðveldi fulltrúum þrýstihópa að koma málum sínum á framfæri.
Í færslu Fimmstjörnuhreyfingarinnar á Twitter segir að breytingarnar, sem voru studdar af nær öllum flokkum, muni spara ítalska ríkinu einn milljarð evra á næstu 10 árum, eða sem nemur rúmum 137 milljörðum króna.