Tugþúsundir manna gengu fylktu liði um götur Parísar og fleiri evrópskra borga í dag til að mótmæla árásum Tyrkja á Kúrda í Sýrlandi.
Mótmælendur héldu græna, gula og rauða þjóðfána Kúrda og mótmælaskiltum á lofti. Á skiltunum stóð meðal annars „Trump = Fjöldamorðingi“ og þá mátti heyra mótmælendur kalla Rcep Tayyip Erdogan, forseta Tyrklands, hryðjuverkamann.
Skipuleggjendur telja að fleiri en 20 þúsund manns hefðu tekið þátt í mótmælunum í París. Mótmæli fóru einnig fram í frönsku borgunum Marseille, Strassborg, Bordeux, Lille og Grenoble. Nokkrir franskir stjórnmálamenn tóku þátt í mótmælunum.
Innrás Tyrkja á Kúrda í norðurhluta Sýrlands hófst fyrir fjórum dögum í kjölfar þess að Donald Trump Bandaríkjaforseti fyrirskipaði hersveitum Bandaríkjahers að yfirgefa herstöðvar sínar á svæðinu. Ákvörðunin er gríðarlega umdeild svo vægt sé til orða tekið og margir telja hana vera skotleyfi á Kúrda sem voru helstu bandamenn Bandaríkjanna í stríðinu gegn Ríki Íslams.
Mótmæli fóru einnig fram í borgum í Þýskalandi, í Búdapest, í Vín, Stokkhólmi, Osló og Nikósíu höfuðborg Kýpur svo dæmi séu tekin.